Tannlækningar með glaðlofti

Hvað er glaðloft?

Glaðloft er lofttegund sem hefur róandi áhrif og getur dregið úr sársaukaskynjun. Við tannlækningar er það gefið í blöndu með súrefni í gegnum litla grímu sem liggur yfir nefinu.

Áhrifin koma yfirleitt fram á fáeinum mínútum. Þú ert vakandi á meðan meðferðinni stendur, andar sjálf/ur og getur átt samskipti við tannlækninn. Sumir finna fyrir hlýju eða léttleika í líkamanum og upplifa að tíminn líði hraðar.

Fyrir hverja hentar glaðloft?

Glaðloft getur hentað þeim sem kvíða tannlæknaheimsóknum, eiga erfitt með að slaka á við meðferð eða eru klígjugjarnir. Það getur einnig auðveldað lengri meðferðir.

Tannlæknir metur hvort glaðloft henti út frá heilsufari, þörfum og fyrirhugaðri meðferð. Til að það virki vel þarf viðkomandi að geta andað um nefið og sætt sig við að hafa nefgrímuna á meðan meðferðinni stendur.

Glaðloft fyrir börn

Glaðloft getur verið gagnleg viðbót við barnatannlækningar, sérstaklega þegar barn finnur fyrir kvíða eða á erfitt með að slaka á. Við gefum barninu tíma til að kynnast grímunni og útskýrum meðferðina á einfaldan hátt. Yfirleitt er fyrsta heimsókn í glaðloft svokallaður æfingatími þar sem lítil eða engin eiginleg tannlæknameðferð á sér stað.

Markmiðið er að auðvelda barninu meðferðina og stuðla að jákvæðri upplifun hjá tannlækninum. Glaðloft kemur til viðbótar við aðlögun, róleg samskipti og uppbyggingu trausts. Það hentar þó ekki öllum börnum og við metum með foreldrum hvaða nálgun er best hverju sinni.

Hvernig fer meðferðin fram?

Áður en meðferð hefst förum við yfir heilsufar, lyfjanotkun og fyrri reynslu af tannlækningum. Þú færð síðan litla grímu yfir nefið og andar rólega í gegnum hana.

Fyrst er gefið súrefni og síðan er glaðlofti blandað við. Styrkurinn er stilltur eftir þörfum og líðan meðan á meðferð stendur. Við fylgjumst með þér allan tímann og þú getur látið vita ef þig vantar hlé eða finnur fyrir óþægindum.

Í lokin er lokað fyrir glaðloftið og gefið súrefni í nokkrar mínútur. Áhrifin ganga til baka á nokkrum mínútum.

Þarf að deyfa þótt glaðloft sé notað?

Já, staðdeyfing er áfram notuð þegar meðferðin krefst þess. Glaðloft hjálpar fyrst og fremst við að draga úr kvíða og auka slökun, en kemur ekki í stað staðdeyfingar. Það getur þó auðveldað þeim sem kvíða deyfingu að takast á við þann hluta meðferðarinnar.

Hvað þarf að hafa í huga fyrir tímann?

Þú færð leiðbeiningar frá okkur um undirbúning, meðal annars um mat og drykk fyrir tímann. Best er að forðast stóra eða þunga máltíð rétt fyrir meðferð.

Láttu okkur vita um sjúkdóma, lyfjanotkun, meðgöngu og nýlegar aðgerðir. Ef þú eða barnið þitt eruð með kvef eða stíflað nef skaltu hafa samband áður en mætt er, þar sem erfitt getur verið að anda glaðloftinu að sér.

Eru aukaverkanir af glaðlofti?

Glaðloft þolist yfirleitt vel þegar það er notað við viðeigandi aðstæður og undir eftirliti. Aukaverkanir geta þó komið fram, svo sem ógleði, svimi eða höfuðverkur. Láttu okkur vita ef þér líður óþægilega svo hægt sé að aðlaga gjöfina eða stöðva hana.

Hvernig líður mér eftir meðferðina?

Áhrif glaðlofts hverfa yfirleitt fljótt eftir að gjöf lýkur. Áður en þú ferð heim metum við líðan þína og hvort þú hafir náð þér að fullu.

Þú færð leiðbeiningar um það sem þarf að hafa í huga eftir tímann, þar á meðal um akstur og athafnir dagsins. Einnig þarf að fylgja ráðleggingum vegna sjálfrar tannmeðferðarinnar, til dæmis ef staðdeyfing er enn virk.

Gæti glaðloft hjálpað þér eða barninu þínu?

Ef þú eða barnið þitt kvíðið tannlæknaheimsókn er velkomið að hafa samband og ræða möguleikana við okkur. Við metum hvort glaðloft henti og skipuleggjum meðferðina í samráði við þig.

Sendu okkur beiðni um tíma eða hringdu í 482-3333.