Viðmiðunargjaldskrá

Meðferðir í tannlækningum eru oft krefjandi og ýmislegt sem getur leitt til þess að endurgera þurfi meðferð eða lagfæra eitthvað sem út af hefur brugðið. Tannlæknaþjónustan býður viðskiptavinum sínum upp á ábyrgð á tannplantameðferðum, tannsmíðameðferðum og fyllingavinnu. 

Ábyrgðin nær yfir tanngervið sjálft, það er að segja krónur, brýr, fyllingar og laus tanngervi. Ábyrgðin nær ekki yfir skemmdir, brot, sprungur eða sýkingar eða los á stoðtönnum.  Ábyrgðin nær aldrei yfir brot eða skemmdir á tanngervi sem verður vegna óeðlilegrar notkunar, áverka eða slysa eða ef tanngervi týnist.

Tannlæknir er ekki í öllum tilfellum skyldugur til að endurgera verk í heild sinni ef galli eða brot í smíði er minniháttar.  Þetta á til dæmis við um minniháttar postulínsbrot sem hægt er að pússa og hefur ekki áhrif á virkni eða útlit smíðinnar.

Almennt er gert ráð fyrir að viðskiptavinur komi að minnsta kosti árlega í reglulegt eftirlit til að halda ábyrgðinni í gildi. Ábyrgðin fellur úr gildi ef viðskiptavinur mætir ekki í reglulegt eftirlit til tannlæknis í 18 mánuði. Viðskiptavinur skuldbindur sig til að hugsa vel um tanngervið og fara að leiðbeiningum tannlæknis hvað varðar umhirðu.  Viðskiptavinur er hvattur til að hafa samband við Tannlæknaþjónustuna ef eitthvað kemur upp sem honum finnst óeðlilegt varðandi tanngervið.  

Tímalengd ábyrgðar er sem hér segir:

Tannplantameðferð.

Ísetning tannplanta er í ábyrgð í 3 ár.  Ef tannplantinn grær ekki fastur er meðferðin endurtekin að kostnaðarlausu.  Ef ekki er hægt að endurtaka meðferð gengur kostnaðurinn upp í aðra meðferð eða er endurgreiddur.  Það er mjög mikilvægt að hafa strax samband við Tannlæknaþjónustuna ef blæðing eða graftarmyndun er við tannplantann. Langvarandi bólga eða sýking stefnir tannplantanum í hættu.

Postulínssmíði á tannplanta er í ábyrgð í 5 ár.

Postulínssmíði á tennur (krónur og brýr) er í ábyrgð í 5 ár.

Líming á postulínskrónum og brúm er í ábyrgð í 2 ár

Laus tanngervi og tanngervi úr plasti , ýmist með málgrind eða ekki, er í ábyrgð í 1 ár

Tannfyllingar eru í ábyrgð í 2 ár.  Hafa skal samband við tannlæknir innan þriggja mánaða ef einhver umkvörtunarefni eru eftir fyllingameðferð.

Plastviðbætur eru í ábyrgð í eitt ár.

Almennt gildir að endurgerð,lagfæring eða viðgerð endurnýjar ekki ábyrgð.

Gjaldskrá Tannlæknaþjónustunnar miðast við staðgreiðslu og almennt er gert ráð fyrir að hver heimsókn sé staðgreidd.  Við tökum við öllum helstu greiðslukortum og einnig tökum við á móti reiðufé.

Við leggjum okkur fram um að upplýsa um kostnað fyrirfram og gera kostnaðaráætlanir ef um umfangsmiklar meðferðir er að ræða.

Við stærri verk, svo sem smíðaverk, tannplantaaðgerðir og slíkt þarf að greiða helming kostnaðaráætlunar þegar verkið hefst. Lokauppgjör fer fram þegar meðferð klárast.

Ef þörf er á að dreifa greiðslum á lengri tíma bjóðum við uppá að skipta upphæðinni á fjóra greiðsluseðla með eindaga á mánaðarfresti. Enginn kostnaður bætist við upphæðina fyrir utan seðilgjaldið.

Ef þörf er á að dreifa greiðslum til lengri tíma bjóðum við uppá að gera raðgreiðslubréf tengt kreditkorti.  Þá er hægt að dreifa greiðslum í allt að 36 mánuði.